ਫੈਡਰੇਸ਼ਨ ਆਫ ਪ੍ਰਾਈਵੇਟ ਸਕੂਲਜ਼ ਐਂਡ ਐਸੋਸੀਏਸ਼ਨਜ਼ ਆਫ ਪੰਜਾਬ (ਰਜਿ.) ਅਤੇ ਸਹਿਯੋਗੀ ਐਸੋਸੀਏਸ਼ਨਾਂ ਰਾਸਾ, ਪੂਸਾ, ਕਾਸਾ ਦੇ ਜ਼ਿਲ੍ਹਾ ਪ੍ਰਤੀਨਿਧਾਂ ਦੀ ਹੋਈ ਹੰਗਾਮੀ ਮੀਟਿੰਗ ਤੋਂ ਬਾਅਦ ਹੋਏ ਫੈਸਲੇ ਮੁਤਾਬਕ 10 ਅਪ੍ਰੈਲ ਤੋਂ ਬਾਅਦ ਪੂਰੇ ਪੰਜਾਬ ਭਰ ਦੇ ਪ੍ਰਾਈਵੇਟ ਸਕੂਲ ਖੋਲੇ ਜਾਣਗੇ ਜੇਕਰ ਇਕੱਲੇ ਸਕੂਲਾਂ ਉੱਪਰ ਲਾਕ ਡਾਊਨ ਵਿਚ ਸਰਕਾਰ ਵੱਲੋਂ ਵਾਧਾ ਕੀਤਾ ਗਿਆ। ਇਹ ਜਾਣਕਾਰੀ ਦਿੰਦਿਆਂ ਫੈਡਰੇਸ਼ਨ ਦੇ ਪ੍ਰਧਾਨ ਜਗਜੀਤ ਸਿੰਘ ਧੂਰੀ ਨੇ ਦੱਸਿਆ ਕਿ ਲਗਭਗ 90 ਪ੍ਰਤੀਸ਼ਤ ਤੋਂ ਵਧੇਰੇ ਮਾਤਾ ਪਿਤਾ ਨੇ ਲਿਖਤੀ ਤੌਰ ਤੇ ਸਕੂਲਾਂ ਤੋਂ ਮੰਗ ਕੀਤੀ ਹੈ ਕਿ ਸਕੂਲ ਖੋਲੇ ਜਾਣ। ਮਾਤਾ ਪਿਤਾ ਇਸ ਵਾਰ ਆਪਣੇ ਬੱਚਿਆਂ ਨੂੰ ਘਰਾਂ ਵਿਚ ਨਹੀਂ ਬਿਠਾਉਣਾ ਚਾਹੁੰਦੇ। ਰਾਸਾ ਦੇ ਪ੍ਰਧਾਨ ਸ. ਹਰਪਾਲ ਸਿੰਘ ਯੂ.ਕੇ. ਅਤੇ ਰਵਿੰਦਰ ਸਿੰਘ ਮਾਨ ਨੇ ਕਿਹਾ ਕਿ ਸਰਕਾਰ ਪ੍ਰਾਈਵੇਟ ਸਕੂਲਾਂ ਨਾਲ ਪੱਖਪਾਤੀ ਰਵੱਈਆ ਬੰਦ ਕਰੇ ਜਿਸ ਤਹਿਤ ਸਰਕਾਰੀ ਸਕੂਲਾਂ ਲਈ ਸਰਕਾਰ ਦੇ ਹੋਰ ਨਿਯਮ ਹਨ ਅਤੇ ਪ੍ਰਾਈਵੇਟ ਲਈ ਹੋਰ। ਉਹਨਾਂ ਕਿਹਾ ਕਿ ਜੇਕਰ ਭਵਿੱਖ ਵਿਚ ਪ੍ਰਾਈਵੇਟ ਸੰਸਥਾਵਾਂ ਦੇ ਵਿਦਿਆਰਥੀ ਧੱਕੇ ਨਾਲ ਫੈਚ ਕੀਤੇ ਤਾਂ ਪੰਜਾਬ ਭਰ ਦਾ ਬਹੁਤ ਵੱਡਾ ਅੰਦੋਲਨ ਹੋਵੇਗਾ। ਮੀਟਿੰਗ ਵਿਚ ਮੌਜੂਦ ਸੰਗਰੂਰ ਤੋਂ ਕਮਲਜੀਤ ਸਿੰਘ ਢੀਂਡਸਾ ਅਤੇ ਲੁਧਿਆਣਾ ਤੋਂ ਮਨਮੋਹਨ ਸਿੰਘ ਦਾ ਕਹਿਣਾ ਹੈ ਕਿ ਜਦੋਂ ਪੂਰੇ ਪੰਜਾਬ ਵਿਚ ਸ਼ਾਪਿੰਗ ਮਾਲ, ਬਜ਼ਾਰ ਖੁੱਲ੍ਹੇ ਹਨ, ਪਬਲਿਕ ਟਰਾਂਸਪੋਰਟ ਚੱਲ ਰਹੀ ਹੈ ਤਾਂ ਇਕੱਲੇ ਸਕੂਲ ਬੰਦ ਕਰਨਾ ਵਾਜ਼ਬ ਨਹੀਂ। ਰੋਪੜ ਦੇ ਪ੍ਰਤੀਨਿਧ ਸੁਖਜਿੰਦਰ ਸਿੰਘ ਅਤੇ ਪਟਿਆਲਾ ਤੋਂ ਭੁਪਿੰਦਰ ਸਿੰਘ ਮੁਤਾਬਕ ਫੈਡਰੇਸ਼ਨ ਦੀ ਕਾਲ ਹੇਠ 10 ਤਰੀਕ ਤੱਕ ਵੱਖ ਵੱਖ ਸ਼ਾਂਤਮਈ ਤਰੀਕਿਆਂ ਨਾਲ ਮਾਪੇ, ਵਿਦਿਆਰਥੀ ਅਤੇ ਅਧਿਆਪਕ ਮਾਨਯੋਗ ਮੁੱਖ ਮੰਤਰੀ ਪੰਜਾਬ ਤੱਕ ਸਕੂਲ ਖੋਲ੍ਹੇ ਜਾਣ ਦੇ ਸੁਨੇਹੇ ਪਹੁੰਚਾਉਣਗੇ। ਬਰਨਾਲਾ ਪ੍ਰਤੀਨਿਧ ਭਗਵੰਤ ਸਿੰਘ ਕੱਟੂ, ਬਠਿੰਡਾ ਪ੍ਰਤੀਨਿਧ ਸੁਖਚੈਨ ਸਿੰਘ ਅਤੇ ਮਾਨਸਾ ਪ੍ਰਤੀਨਿਧ ਸੰਜੀਵ ਕੁਮਾਰ ਦਾ ਕਹਿਣਾ ਹੈ ਕਿ ਮਾਪੇ ਹੁਣ ਸਕੂਲਾਂ ਦੇ ਕੰਟਰੋਲ ਤੋਂ ਬਾਹਰ ਹਨ ਅਤੇ ਉਹ ਆਪਣੀ ਇੱਛਾ ਅਨੁਸਾਰ ਸੜਕਾਂ ਤੇ ਉਤਰ ਆਏ ਹਨ। ਫੈਡਰੇਸ਼ਨ ਦੀ ਕਾਲ ਤੇ ਸਿਰਫ 10 ਅਧਿਆਪਕ, 10 ਮਾਪੇ ਅਤੇ 10 ਟਰਾਂਸਪੋਰਟ ਮੁਲਾਜ਼ਮਾਂ ਦੇ ਇਕੱਠੇ ਹੋਣ ਨਾਲ ਹੀ ਹਰ ਜ਼ਿਲ੍ਹੇ ਵਿਚ 5000 ਤੋਂ 10000 ਦੇ ਇਕੱਠ ਨੇ ਮਾਨਯੋਗ ਡਿਪਟੀ ਕਮਿਸ਼ਨਰਾਂ ਨੂੰ ਮੈਮੋਰੰਡਮ ਦਿੱਤੇ ਸਨ। ਮੋਗਾ ਪ੍ਰਤੀਨਿਧ ਸੰਜੀਵ ਸੈਣੀ ਨੇ ਕਿਹਾ ਕਿ ਜੇਕਰ ਸਰਕਾਰ ਵੱਲੋਂ ਇਕੱਲੇ ਸਕੂਲਾਂ ਨਾਲ ਕੋਈ ਵਧੀਕੀ ਕੀਤੀ ਗਈ ਤਾਂ ਪੰਜ ਲੱਖ ਮੁਲਾਜ਼ਮਾਂ ਦੇ ਪਰਿਵਾਰ ਅਤੇ ਲਗਭਗ 25 ਲੱਖ ਮਾਪੇ ਸੜਕਾਂ ਤੇ ਹੋਣਗੇ ਜਿਹਨਾਂ ਦੀ ਗਿਣਤੀ ਕਿਸਾਨ ਅੰਦੋਲਨ ਨਾਲੋਂ ਪੰਜ ਗੁਣਾ ਹੋਵੇਗੀ। ਫੈਡਰੇਸ਼ਨ ਦੇ ਨੁਮਾਇੰਦਿਆਂ ਗੌਰਵ ਗੁਪਤਾ, ਡਾ. ਮੋਹਿਤ ਮਹਾਜਨ, ਡਾ. ਆਸਾ ਸਿੰਘ, ਏਕਮ ਸਿੰਘ, ਯੋਹਾਨਨ ਮੈਥਿਊ, ਤਰਲੋਚਨ ਸਿੰਘ, ਵਰੁਨ ਜੈਨ, ਪ੍ਰਿਤਪਾਲ ਸ਼ਰਮਾ ਨੇ ਸਰਕਾਰ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਬੱਚਿਆਂ ਦੇ ਭਵਿੱਖ ਨੂੰ ਧਿਆਨ ਵਿਚ ਰੱਖਦਿਆਂ ਸਕੂਲ ਖੋਲੇ ਜਾਣ।